意大利十天鴨仔旅 - 後記、戰利品及手信篇

總結一下今次意大利之旅～

1. 好開心遇到好領導，帶住38個團友唔易應付，順得果個又順唔到果個...團中亦有部份不守規矩的團友，仲有兩個小學生團友不停退燒發燒，佢都盡量去handle。最抵讚係，我第一日問佢邊度有郵票買，佢第二日知我仲未買到就話「我幫你去買啦，等你哋自由時間可以用盡啲」跟住第三日就真係比到我，順利咁寄出咗啲Postcard.

2. 好感恩天氣真係好好，咁多日只係兩日陰天，半日雨天，比到機會我哋親眼睇到好多Postcard一樣咁靚嘅景色～

3. 好驚訝意大利餐真係食得好慢，唔知係團員太多定咩，好多時一餐只係三四道菜都要食起碼兩粒鐘，上菜真係慢得好緊要....而且...食咗咁多餐意大利菜....意粉呢類應該會個幾兩個月都唔會想食

4. 好高興喺團入面有幾個傾得埋嘅團友，特別係飯腳嘅兩位姐姐（因每餐最少都四人一枱），多咗唔少歡樂。雖然團入面真係有著各種各樣嘅人，好似獨男影相王、堅離地闊太、自備物資充足嘅澳門家庭等等，但呢啲都係增加回憶嘅部份。

5. 去意大利真係一個好難得嘅機會同經驗，見識多咗，時差又唔係想像中咁難適應，今次仲試過經歷夏令時間，一日得返23小時。亦嘗試過坐13小時飛機嘅困擾，如果唔洗坐咁耐機，去歐洲嘅興趣應該會提高嘅～

6. 我哋個樣又令大部份團友以為我哋係fresh grad，出嚟畢業旅行。有Pair係Honeymoon，所以傾開我哋已經結咗幾年婚同埋做咗11年嘢都嚇咗佢哋一跳～



至於洗費方便～

主要係貴咗喺團費度，喺意大利嘅開支唔太多，成個旅程每人約用了二萬八元港幣，啲數都太散，今次無做圖表。


最後就係戰利品大合照～





意大利都唔興吸印仔，所以都無印仔篇～

返回 意大利十天鴨仔旅 - 行程目錄